DAVAO CITY- Gideklarang dead on arrival pasado alas 3:05 kaganihang kaadlawon ang usa ka dayong lalake human kini misukol sa gikasang buy-bust operation sa San Pedro Police Station sa usa ka inn nga nahimutang sa Barangay 3-A, General Luna Street ning dakbayan sa Dabaw.
Sa impormasyong nakuha sa Bombo Radyo Davao sa San Pedro PNP, nasayran nga namaligya ang suspetsado og druga sulod mismo sa inn. Positibo kining napalitan sa pulis nga nagtakubang buyer og usa ka pakete sa pinaugang dahon sa marijuana.
Atol sa operasyon, nakamatikod ang suspek nga pulis na diay ang ka-transaksyon niini rason nga mibunlot kini sa iyang armas ug nagpabuto sa otoridad.
Gilayong mibalos og pabuto ang kapulisan rason nga naka-angkon ang suspek og samad pinusilan sa abaga ug likod niini nga maoy hinungdan sa iyang hinanaling kamatayon.
Subay sa rekord, nailhan ang maong suspetsado nga si Tito Pansian Aniscal alyas Tito, 35 anyos, walay trabaho ug residente sa Purok San Isidro Labrador, Indangan ning siyudad.
Nakuha sa posisyon ni Aniscal ang .38 kalibre nga pistola ug 5 ka buhi nga bala, 13 ka pakete sa pinaugang dahon sa marijuana, usa ka sachet sa ginatuohang shabu, usa ka hand bag nga brown nga maoy gisudlan og iligal nga droga, 1,000 pesos nga marked money ug 1,156 nga personal nga kwarta sa suspek.
Sa pagkakaron, anaa sa morgue sa Southern Philipines Medical Center nagbuy-od ang patayng lawas sa suspetsado ug ginahulat na lamang nga adunay tagtungod nga mukuha niini.
