DAVAO CITY – Gikumpirma sa Department of Trade and Industry 11 nga walay paglihok sa presyo sa mga nag-unang palaliton ug noche buena items tungod wala pay gipagawas nga suggested retail price kon SRP ang buhatan gikan sa main office.
Apan gikanayon sa Legal Officer sa ahensya nga si Atty. Dianne Bay Grado sa nahimong pakighinabi sa Bombo Radyo Davao nga nanukad na sila sa ilang price monitoring sa mga grocery stores ug supermarkets sa rehiyon.
Luyo sab sa presyo sa matag items, ginatan-aw sab sa buhatan ang kalidad sa mga produkto subay na sa Philippine Standards.
Gipaklaro sab sa DTI 11 nga walay labot sa ilang hurisdiksyon ang pagsaka sa presyo sa mga softdrinks gumikan wala kini gikonsidera ang maong ilimnon isip prime commodity.
Apan kon makitaan man ug ilabihang pagsaka sa mga presyo niini, mamahimo nilang idangop kini sa mga LGUs o dili kaha sa ilang opisina.
Sa pikas bahin, nag-awhag karon ang DTI 11 sa pagpaniid sa SRP sa mga nag-unang palaliton sa ilang website o sa mga social media pages.
via || Bombo LJ Florendo
