DAVAO CITY- Gikanayon ni DCPO spokesperson Catherine Dela Rey nga mas gipakusgan sa kapulisan ang Oplan RATS Tugis kon Robbery, Akyat-Bahay, Thief ug Snatching ilabi na karong ber months tungod nagka-anam na usab og balik ang mga mapahimuslanon ug adunay dautang binuhatan nga mga indbidwal labaw na nga mudagsa na usab ang mga tawo sa mga mall tungod mamalit og mga bag-ong gamit ug pagkaon nga ihanda sa kapaskuhan ug bag-ong tuig.
Daghan sab ang maglulinghayaw niining maong panahon. Gumikan niini, nagpahimangno ang kapulisan sa katawhang Dabawenyo nga mag-amping ug mahimong magbinantayon sa palibot ilabi na sa mga lugar nga daghang tawo.
Mihangyo usab ang kapulisan nga i-report kung aduna may mga katingalahang kalihukan sa palibot aron gilayon kining marespondehan.
Dugang pa niini nga karong adlawa, pagabuhaton ang Security Coordinating Conference alang sa pagpreparar sa seguridad sa umaabot nga kalag-kalag.
Sa pagkakaron, ginapaabot na lang sa buhatan ang protocol nga ipatuman ilawom sa maong aktibidad.
