DAVAO CITY- Nagsugod na ang City Social Welfare and Development Office (CSWDO) sa paglista og mga centenarians nga mahatagan og incentive alang sa sunod tuig.
Kini mismo ang gikanayon ni Atty. Marlisa Gallo, hepe sa CSWDO, diin sumala pa niini nga sa sunod tuig, ihatag nilla ang P100,000 nga cash incentive atol mismo sa adlaw nga natawhan sa mga centenarian.
Kahinumduman nga niadtong adlaw nga Lunes lamang, muabot sa 32 ka mga centenarians ning syudad ang gipasidunggan sa lokal nga panggamhanan.
Sa pikas bahin, nanawagan ang opisyal sa katawhang dabawenyo nga kung aduna kamoy miyembro sa pamilya nga senior ug nag-edad na daan og 99 years old, mamahimo nga magsubmit daan og requirements sa buhatan sa CSWDO aron ma-andam na daan ang award niini isip centenarian.
Aron nga mag-qualify, kinahanglan lamang nga i-fill out sa usa ka awardee o miyembro sa pamilya niini ang application form gikan sa CSWDO-District Office ug magpakita og birth certificate o dili ba kaha passport. Ginadawat sab ang primary ug secondary identification cards.
