DAVAO CITY – Luwas ug anaa sa maayong kahimtang ang pamilya ni Lovely Zendy Chavez human gikusokuso sa hurricane Ian ang pipila ka mga bahin sa Florida sa Estados Unidos.
Sa pagpakighinabi sa Bombo Radyo Davao, gibutyag ni Lovely nga mao kini ang pinakalabing kusog nga bagyo nga naigo sa Florida state.
Ilabihang naigo ang Fort Myers diin apektado ang kapin libo nga mga lumulupyo.
Naputol sab ang mga linya sa kuryente, tubig ug komunikasyon sa lugar. Naanod sab ang mga kabalayan gumikan sa kakusog sa ulan ug hangin nga midagayday sa lugar.
Kasamtangang nagpuyo si Lovely sa Jacksonville nga pila ka milya lamang ang gilay-on gikan sa ground zero sa bagyo.
Nakahukom ang atong kababayan nga ang Hurricane Ian ang nagbaton ug pinakalala nga kadaot ug kaguba sa dyise nuebe ka tuig niyang pagpuyo sa Florida state.
Subay sa latest monitoring sa Division of Emergency Management sa Florida, adunay 14 nga mga nakabsan ug kinabuhi tungod sa Category 4 nga Hurricane Ian, ug posibleng musaka pa ang death toll niini.
Unang nag-landfall ang Hurricane Ian sa habagatan-kasadpan bahin sa Florida niadtong Myerkules sa hapon, oras sa Amerika.
VIA || Bombo LJ Florendo
