DAVAO CITY – Nagpadayag ug pagsabot ang Davao City Water District ngadto sa konsumante atol sa mga kakulian nga giatubang sa buhatan sa kasamtangang bulan.
Sa pakighinabi sa Bombo Radyo Davao, gikanayon ni Davao City Water District Spokesperson Jovanna Duhaylungsod nga balik normal na ang suplay sa tubig sa mga nahimong apektadong lugar sa dakbayan human sa sunod-sunod nga water interruptions sa nilabayng mga simana.
Naghatag sab ug update ang buhatan mahitungod sa bulk water supply project nga kasamtangang ginalihok uban ang contractor nga Apo Agua Infrastructura Inc.
Gibutyag nilang hapit nang manukad sa operasyon ang maong proyekto sa unang bahin sa musunod nga tuig.
Gipaniguro sab nga mapaigo ang mahatag nga suplay sa tubig sa tanang mga konsumante tungod maghatag ang maong pasilidad ug 300 million liters sa tubig sa gibana-banang usa ka milyon nga konsumante sa tibuok dakbayan.
Gitubag sab sa buhatan ang nahimong suhestyon sa usa ka konsehal sa dakbayan nga magdungag ug laing water supply provider gawas sa DCWD.
Sumala pa ni Duhaylungsod nga abli ang buhatan sa maong sugyot ilabi nang duna puy ubang mga laing water providers ang pipila ka bahin sa Davao City.
Apan pakusgan pa nila ang pagpanerbisyo sa kadaghanan pinaagi sa paghatag ug bastanteng suplay sa tubig.
via || Bombo LJ Florendo
