DAVAO CITY- Patay ang usa ka 20 anyos nga babae human kining gitigbas sa makadaghang higayon sa kaugalingon niining live-in partner kaganihang kaadlawon sulod mismo sa ilang panimalay sa Barangay Dumlan, Maco probinsya sa Davao de Oro.
Giila ang biktima nga usa ka Jelly Joy Coscos, 20 anyos samtang ang live-in partner niini nga mao usab ang suspek ang giilang si Jimmy Genobiagon Artelahon, 28 anyos, usa ka mag-uuma ug residente sa maong lugar.
Sa gipahigayong imbestigasyon sa Maco Municipal Police Station, nasayran nga nagsaulog ang mga nahisgutan sa adlaw’ng natawhan sa ilang anak kagahapon apan sa wala damhang panghitabo, kalit lamang nagkalalis ang duruha nga misantop sa grabeng panag-away.
Gumikan niini, mibahad matud pa ang biktima nga mulayas sa ilang panimalay ug dalaon ang ilang anak. Apan wala kini nauyonan sa suspek rason nga gitigbas niini sulod sa makadaghang higayon ang iyang partner.
Nagbaton og daghang samad tinigbasan ang biktima sa iyang ulo, likod ug nagkadaiyang bahin sa iyang kalawasan nga maoy hinungdan sa hinanali niining kamatayon. Gilayon usab nga misurender ang suspek human nga makaamgo sa krimen nga iyang nahimo.
