DAVAO CITY – Hingpit na nga gi-ablihan ang ika-37 nga kasaulogan sa Kadayawan Festival diri sa dakbayan sa Davao pinaagi sa Misa Pasalamat nga gipahigayon sa Bantawan Ampitheater ug ang Pag-abli sa Kadayawan nga gipahigayon sa Magsaysay Park.
Ang opening ceremony ang gipangunahan mismo ni Davao City Mayor Sebastian “Baste” Duterte ug mga tribal leaders gikan sa onse ka mga tribo sa syudad.
Dako ang kalipay ug paghinam-hinam sa mga Dabawenyo gumikan sa labing unang higayon human sa pagkahunong niini sulod sa sobra duha ka tuig gumikan sa pandemya, face to face nang ipahigayon ang kasaulogan.
Ang Kadayawan Festival, nga gitawag isip King of Philippine Festivals, usa ka tinuig nga kasaulogan alang sa kaabunda sa ani, kahiusahan sa mga tribo sa dakbayan, ug ang mga kalampusang naangkon sa syudad taliwala sa mga kalisdanan ug katalagman.
Sa pikas bahin, ipahigayon sa Agosto 17 ang coronation night sa Hiyas sa Kadayawan diin onse ka mga maanyag ug dalagang representante sa nagkadaiyang mga tribo sa Davao ang magtigi alang sa titulo.
Samtang ang tibuok adlaw sab sa Agosto 18 ang mapuno og mga pasundayag gikan sa mga nagkalain-laing tribo sa dakbayan pinaagi sa Sayaw Kadayawan ug Bantawan.
Samtang magpaugnat sab og kusog ang mga tribal communities ug mga katutubong laro sa Dula Kadayawan karong umaabot nga Agosto 19.
Kinahanglang sab atangan ang mga grandiyosong mga aktibidad sa Kadayawan sama sa Indak-Indak sa Kadayawan karung Agosto 20, ug Pamulak sa Kadayawan karung Agosto 21 nga gilaumang dagsaon sa libuan ka mga lokal ug mga turista sa may dalang San Pedro.
Nagpahimangno na lamang ang Davao City Public Safety and Security Command Center nga kinahanglang mupatigbabaw ang culture of security alang sa seguridad sa mga bisita.
Una nang gipahinumdom nga bawal ang pagbitbit og backpack, pagsul-ob og jacket, pagdala’g mga hait ug talinis nga mga hinagiban ug ingon man, mga non-transparent nga mga sudlanan sa tubig.
Kapin dose mil ka mga security personnel sab ang ipakatag sa mga nag-unang mga kadalanan sa dakbayan hangtud sa ulahing adlaw sa kasaulogan.
Ginaawhag sab sa Davao City Health Office ang katawhan nga magsunod sa mga minimum public health standards sa gumikan sa kasaulogan panahon sa pandemya.
