DAVAO CITY – Gihangyo karon ang mga vendors sa San Pedro Street partikular na kadtong mga nahimutang sa Bolton Street nga likayan usa ang pagbaligya sa ilang mga produkto sa adlaw nga Sabado, Hunyo 18, ug adlaw nga Domingo, Hunyo 19, aron nga mahatagan og dalan ang gikatakdang Oath-taking ceremony ni Vice President-elect Inday Sara Duterte.
Apan tungod niini, nakadawat og pipila ka reklamo ang buhatan sa Auxiliary Services Unit (ASU) gikan sa mga vendors nga gikatahong mibalibad sa temporaryong pag suspende sa ilang pagpamaligya sa maong mga adlaw.
Gilayon usab nga nagpahigayon og pakigdayalogo ang ASU ngadto sa mga vendors sa San Pedro Square kagahapong adlawa sa Osmeña Park.
Giklaro usab ni Paul Bermejo, Hepe sa Auxiliary Services Unit, ngadto sa mga vendors nga wala ginabawalan nga maninda ang mga nahisgutan.
Apan kadtong anaa nahimutang doul sa stage, ilabi na ang mga mamaligyaay nga anaa dapit sa Unitop ug Banco Filipino mao ang temporaryo lamang nga ipasara hangtud mahuman ang oath-taking ni VP-elect Inday Sara.
Dugang pagpaklaro usab ni Bermejo ngadto sa mga vendors nga mamahimo sila nga mubalhin sa ubang area.
Usa sa rason sa temporaryong pagpahunong sa mga aktibidad sa mga vendors dapit sa San Pedro Square mao ang pagsiguro sa security concerns ug spatial management issues diin lauman usab ang maong event nga tambungan sa gibana-banaang mukabat sa 25,000 ka mga indibidwal.
Nasayran nga adunay says sientos ka mga vendors sulod sa San Pedro Square ang na-identify ug na-acknowledge sa ASU kaniadto apan ang maong ihap ang nanaghan na karong panahona.
Hinoon, nahimong malinawon ang pakigdayalogo sa buhatan sa mga vendors ug gipasalig nga mamahimo gihapon silang magpadayon sa ilang pagpamaligya sa maong area human sa oath-taking ni Vice President Inday.
