DAVAO CITY – Mitino ang Davao City COVID-19 Task Force nga bisan kompleto na sa bakuna ang usa ka indibidwal apan kung na-expose kini sa usa ka tawo nga kumpirmadong positibo sa COVID-19 kinahanglan pa gihapon kompletohan niini ang 14-day quarantine.
Sumala pa kang Dr. Michelle Schlosser, Davao City COVID-19 Task Force spokesperson bisan nga negatibo sumala pa ang RT-PCR test sa usa ka indibidwal apan ang close contact niini ang asymptomatic, kinahanglan pa gihapon kini nga mopailalom sa duruha ka semana nga quarantine.
Gipanghimakak sab niini ang migula nga mga report nga moubos na lamang ang adlaw sa quarantine sa mga indibidwal nga kompleto na ang bakuna.
Kahinumduman nga kaniadtong bulan sa Hulyo, nagpagula ang Inter-Agency Task Force ug resolusyon nga nagtugot sa mga fully vaccinated nga mga indibidwal nga na-expose sa mga nagpositibo sa Covid-19 nga mopailalom na lamang sa pito ka adlaw nga quarantine period apan kinahanglan nga pabilin nga asymptomatic ang indibidwal sulod sa pito ka adlaw sukad sa ulahing exposure niini.
Apan gilayon sab dayon nga gibawi ang maong kamandoan kaniadtong milabay nga Agosto 10.
Gikanayon sab sa Department of Health (DOH) nga ang usa ka tawo gikonsidera nga expose sa infected individual sa higayon nga adunay kini “face-to-face contact sulod sa usa ka metro o sulod sa 15 ka minuto, adunay direct physical contact, adunay direkta nga pag-atiman sa usa ka tawo bisan nga walay suot nga personal protective equipment ug uban pang sitwasyon nga sakop sa local risk assessments.
