DAVAO CITY – Gitino ni Task Force Davao Commander Colonel Consolito Yecla nga bisan temporaryo nila karon nga gihunong ang pag-scan sa Safe Davao QR (DQR) ug food and medicine (FM) passes sa tanan nga mga quarantine checkpoints sa siyudad, hugtanon pa gihapon nila nga ipatuman ang inspeksiyon sa mga indibidwal nga molatas sa mga checkpoints ug subayon ang uban pa nga mga rekisitos.
Sumala pa kang Yecla, nga dili nila basta-basta pasudlon kadtong dili mahinungdanon ang lakaw kini aron malikayan sab ang posibleng mass gatherings ilabi na nga pabilin pa gihapon karon nga gipailalom ang dakbayan sa community quarantine (GCQ) hangtud Pebrero 28, 2021.
Dili sab sumala pa makaapekto ang temporaryo nga suspensiyon sa DQR scanning sa checkpoints sa ilang operasyon sanglit ang QR system gimugna lamang alang sa contact tracing.
