DAVAO CITY – Gitin-aw ni COVID-19 focal person Dr. Ashley Lopez ang kalabot sa managlahi nga datos nga ginapagula sa Department of Health National ug Regional sa ihap sa mga nagpositibo sa COVID-19 sa dakbayan sa Dabaw diin pipila na sab kahigayon nga namatikdan ang managlahi o dili pareho nga number of cases nga natala sa case bulletin.
Sumala sa pamahayag ni Dr. Lopez, lahi matud pa ang ginagamit nga formula sa pagtala og COVID-19 cases sa DOH Regional ug National hinungdan nga mamatikdan nga dako ang kalahian kung itandi ang cases bulletin sa mga nahisgutan nga ahensya.
Usa sab matud pa sa hinungdan niini ang cut-off time sa pagdawat og datos sa DOH national ug Regional.
Gitambag na lamang ni Dr. Lopez ngadto sa katawhan nga dili na mag base sa bulletin sa DOH national ug mas labing maayo nga sa DOH XI na lamang mag base sa datos sa COVID-19 sa syudad.
Gitataw sab niini nga aduna matud pay higayon nga dili gilayon niini mareport ang mga indibidwal nga padayon nga naka-isolate sa temporary treatment and monitoring facility sa dakbayan.
