DAVAO CITY – Mikabat sa kinatibuk-ang 101 Covid-19 fatalities ang natala sulod lamang sa bulan sa Oktubre sa Davao Region, diin kini ang pinakadakong ihap sa mga namatay gumikan sa virus sukad nga nahitabo ang pandemic sa rehiyon kaniadtong bulan sa Marso ning kasamtangan nga tuig.
Sumala sa Department of Health-Davao Region (DOH-Davao), nga base sa datos DOH, nagsugod ang pagsaka sa kaso sa mga namatay kaniadtong bulan sa Hulyo diin sa nahisgutan nga panahon gipailalom na ang tibuok rehiyon sa modified general community quarantine (MGCQ) ang pinakaubos nga quarantine status nga gipatuman sa Inter-Agency Task Force on Emerging Infectious Diseases (IATF-EID).
Sa nahisgutan nga bulan anaa sa 15 ang natalang namatay samtang sa bulan sa Agosto, anaa sa 19 ang natalang namatay samtang 27 sa Setyembre ug 101 sa bulan sa Oktubre.
Kahinumduman nga halos matag adlaw sa milabay nga bulan adunay matalang mamatay sa rehiyon o adunay halos lima matag adlaw ang average death.
Gikanayong sukad kaniadtong Oktubre 31, ang DOH-Davao nakatala na ug kinatibuk-ang 195 deaths sa rehiyon gawas sa mga bag-ong natala nga namatay sa nahisgutan nga adlaw.
Subay sa breakdown sa kaso matag probinsiya ug siyudad sa rehiyon, ang Davao City ang adunay pinakadaghan ug ihap sa Covid-19 deaths nga anaa sa 164, gisundan kini sa Davao del Sur uban ang 13 ug Davao del Norte adunay 10.
Samtang ang Davao Oriental ug Davao de Oro susama nga adunay tig-tulo ka mga natalang namatay ug Davao Occidental adunay duruha.
Sagad sumala pa mga namatay sa nahisgutan nga panahon ang nag-edad ug 60 anyos pataas diin adunay mga existing nga sakit usab ang mga pasyente.
