DAVAO CITY – Gipahibalo sa Task Force Davao (TFD) nga magpahigayon sila ug community exercises sa mosunod nga semana.
Sumala pa kang TFD Commander Consolito Yecla, tumong niini nga masukod ang kaandam dili lamang sa mga otoridad kung dili lakip na sa publiko.
Gipasalig sa opisyal nga dili sama sa simulation exercises, dili matud pa kini makabalda sa dagan sa trapiko ingon man sa gimbuhaton sa mga tawo.
Gikanayong adunay mga magpaka-aron ingnon nga mga terorista ug dinhi masayran kung unsa ka paspas ang pagresponde sa law enforcement unit ingon man pagpahibalo sa publiko ngadto sa otoridad sa higayon nga mabutang sa susama nga senaryo.
Kaabag sa TFD ang Public Safety and Security Command Center (PSSCC) ingon man ang Davao City Police Office (DCPO).
Samtang gibutyag sab ni Davao City Police Office (DCPO) Director Pol. Col. Kirby John Kraft, nga walay angayan nga kabalak-an ang katawhan sa susama nga mga aktibidad sa otoridad gumikan kay kabahin kini sa kampanya sa culture of security ilabi na nga dili mahibaw-an ang susama nga mga panghitabo.
