DAVAO CITY – Balhog sa prisohan ang usa ka German National human nga gidakop gumikan kay misupak kini sa gipatumang EO No. 23 gumikan sa wala pagsuot og face mask sa Buhangin Public Market.
Subay na sa report gikan sa Buhangin Police Station, naila ang langyaw nga si Yohan Newbawer (JOCHEN NEUBAUER), 65-anyos, minyo og kasamtangang nagpuyo sa Cuidad Ezperanza, Brgy. Cabantian, Buhangin, Davao City.
Ang suspek nadakpang wala’y suot nga facemask samtang nagsakay sa iyang motorsiklo sa maong palengke hinungda nga gisita kini sa sakop sa Motorcycle Riding Safety (MRS) unit sa Quarantine Control Point-2 (QCP-2) sa Tigatto Road.
Arogante ug gisyagitan sumala pa sa suspek ang otoridad nga misita kaniya ug didto nasuta nga wala’y dalang legal nga dokumento sa iyang motor ingun man expired na usab ang iyang gihuptang Driver’s License.
Patong-patong nga kaso ang atubangon karon sa langyaw og kasamtangan na kining gipaslak sa bilanguan.
