DAVAO CITY – Nanawagan karon ang ahensiya sa Business Bureau ngadto sa mga negosyante nga kinahanglan pahimuslan na ang kahigayonan ug dili hulaton pa nga matapos ang deadline sa pagpa-renew o pagkuha og business permit nga kutob na lamang sa adlaw nga biyernes sa alas dose sa tungang kagabhion.
Sumala pa kang Atty. Marissa Torentera, head sa Business Bureau, nga sukad Enero 2 hangtud na sa 27 ning kasamtangang tuig, nakatala na sila og 33,925 ka mga nag-apply og permit samtang anaa sab sa 13,833 ang ilang na-isyu nga business permit.
Samtang mikabat na sab sa 25,146 ka mga negosyante ang nakabayad og business permit samtang kapin P1 Billion pesos usab ang ilang nakolekta.
Gitino ni Atty. Torentera nga kung ugaling dili pa makabayad ang negosyante hangtud sa deadline sa Enero 31, pahamtangan na kini og penalty nga 25% ug surcharge nga 2% matag bulan.
Nanghinaut na lamang ang opisyal nga makab-ot nila ang target ilabi na nga wala nila gipadaplin ang posibilidad nga aduna nay pipila ka mga negosyo ang nagsara.
Pahayag ni Atty. Marissa Torentera, head sa Business Bureau.
