DAVAO CITY – Nanawagan ang ahensiya sa Department of Education (DepED) 11 ngadto sa mga magtutudlo sa Talaingod Davao del Norte ilabi na kadtong nadestino sa mga hilit nga lugar nga kinahanglan motamud kung unsa man ang gipagulang kamandoan sa lokal nga panggamhanan aron nga mapabilin nga luwas ang mga nahisgutan.
Tipik lamang kini human nga usa ka magtutudlo ang nakadawat sumala pa ug text message nga nagkanayong molusad ug pangayaw ang mga lumad batok sa mga magtutudlo sa DepEd human nga gipasirad-an ang daghanang tulonghaan sa Salugpongan.
Kahinumduman nga siyam ka mga tulonghaan sa nahisgutan nga lalawigan ang temporaryo karon nga gisuspende ang klase gumikan sa nahisgutan nga bahad.
Sumala pa kang DepEd spokesperson Jenielito Dodong Atillo, bisan nga dili makumpirma kung gikan gayud sa mga lumad ang nahisgutan nga mensahe, angayan nga ikonsidera pa gihapon kini nga usa ka seryoso nga pahayag hinungdan nga gipahimangnoan ang mga magtutudlo sa nahisgutan nga lalawigan nga motamud na lamang sa kamandoan sa ahensiya.
