DAVAO CITY – Nakadesisyon ang usa ka manager sa hardware sa S.I.R Sandawa, New Matina ning dakbayan nga mopasaka ug kaso batok sa iyang saleslady nga misulay paghilo kaniya pinaagi sa pagbutang ug kemikal sa iyang giinom nga kape.
Kahinumduman nga miduso sa iyang reklamo kagahapon sa Talomo Police Station ang usa ka manager nga giilang si alyas Malou human niini nasayran nga gisulayan siya paghilo sa suspek nga si alyas Catherine, 23 anyos residente sa Malita, Davao Occidental.
Sumala pa kang alyas Malou, samtang miadto siya sa banyo gibutangan sa suspek ug kemikal nga asido ang iyang gibilin nga kape hinungdan nga iya kining giluwa gumikan sa dili maayong lasa.
Iyang nakumpirma nga gibutangan kini sa suspek ug kemikal human nga iyang gi-review ang kuha sa closed-circuit television (CCTV) camera.
Sumala pa kang alyas Catherine, gibutangan niya ug kemikal ang kape sa manager gumikan sa iyang kalagot niini.
Pabilin karon nga gibalhug sa presohan ang suspetsado.
