DAVAO CITY – Gipasalig sa ahensiya sa Commission on Election (Comelec) nga bastante ang ihap sa mga magsilbing Board of Election Inspectors (BEIs) sa adlaw mismo sa eleksiyon karong Mayo 13.
Apan kung ugaling adunay mga BEIs nga dili makatungha gumikan sa pipila ka mga kakuli-an, andam nga magsilbing BEIs ang mga sakop sa kapulisan.
Tipik lamang kini human nga gibansay ang 573 ka mga personahe sa kapulisan gikan sa Police Regional Office (PRO) 11 aron nga magsilbi ang mga nahisgutan isip last option sa higayon nga wala ang mga magtutudlo kini aron masiguro nga mapahigayon pa gihapon ang eleksiyon sa gitakda nga petsa.
Hinuon gitino ni Atty. Krisna Caballero, tigpamaba sa Comelec 11 nga kinahanglan pa gihapon nga ipatuman ang mga sumbanan ug protocols sa ahensiya diin ang mga magtutudlo ang magsilbing BEIs. Sa kasamtangan kompleto na matud pa ang ihap sa mga nahisgutan sa tibuok Davao region.
