DAVAO CITY – Makit-an na sa mga taga-dakbayan sa Davao ang mga moderno nga mga bus nga mao ang mobiyahe sa mga nag-una nga rota sa dakbayan.
Nasayran nga i-presenta na karong bulana ang mga bus nga mao ang mobiyahe subay sa high priority bus system sa local nga kagamhanan.
Kini ang nasayran gikan kang Konsehal Conde Baluran, nga mao ang Chairman sa Committee On Transportation sa 18th City Council, kinsa namahayag nga i-atol sa Kadayawan Sa Davao ang pagpakita sa mga modern nga mga bus ug motanyag ug libre nga sakay.
Nasayran nga usa ka rota lamang una ang subayon sa bus alayon sa ilang nasabotan sa Land Transportation Franchising and Regulatory Board (LTFRB).
Ang high priority bus system mao ang gisaad ni Mayor Inday Sara Duterte-Carpio nga nahimong posible gumikan kay gipundohan kini sa Asian Development Bank (ADB).
Gipasalig sab sa LTFRB Chairman Martin Delgra nga makahatag ug hapsay nga biyahe ngadto sa mga sumasakay ang modern nga mga bus.
Gilauman nga pinaagi niini mas mamahimo na nga paspas ang biyahe sa mga sakyanan sa dakbayan.
