DAVAO CITY – Nagtuo ang Davao City Police Office (DCPO) nga driver na sa Mobile Patrol sa kapolisan ayha pa nahilambigit sa pagpamaligya ug illegal nga druga ang gidakop nga suspek.
Kahinumduman nga gidakop ang usa ka driver sa mobile patrol sa Davao City Police Office (DCPO) human kini namaligya ug illegal nga druga niadtong Sabado sa hapon.
Naila ang suspek nga usa ka Joseph Medel, Jr. alyas Toto nga napalitan uig usa ka sachet sa gidudahan shabu atol sa gipahigayon nga buy bust operation sa Fatima kanto Pag-asa, Barangay 25-C, diin napalit kang Medel ang shabu nga mikantidad ug kinyentos ka pesos.
Sumala pa kang Police Chief Inspector Michael Uyanguren, gikonsidera nga high value target second level ang suspek gumikan kay empleyado siya sa lokal nga kagamhanan, partikular ang pagka-driver niini sa mobile patrol sa DCPO.
Gawas sa illegal nga druga, nasakmit sab sa suspek ang duha ka mga rectangular shape nga naundan ug shabu nga mitimbang ug .8 gramos.
Gikatuohan nga driver na sa DCPO ang suspek dihang nahilambit sa illegal nga druga.
Kini human gipahayag sa DCPO nga gipailalum nila sa background check ang suspek ug maayo ang record niini sa dihang ilang gi-hire.
