DAVAO CITY – Gihatagan ug hero’s welcome sa lokal nga kagamhanan sa Panabo City kaganinang buntag si super IBF Junior Bantamweight champion Jerwin “Pretty Boy” Ancajas.
Sa pakighinabi sa Bombo Radyo kang Michael Angelo Resueño, ang Public Information Officer sa Panabo City, gikanayon niini nga mi-abot sa Panabo City Hall si Jerwin alas siete kaganinang buntag.
Gisugat kini ni Panabo city mayor James Gamao ug dungan sila nga namahaw. Human namahaw, gipahigayon gilayon ang usaka motorcade nga milibot sa tibuok bahin sa Panabo.
Gisundan ang motorcade sa usaka hamubo nga programa diin nagpasamat ang boksidor sa dakong suporta nga gihatag kaniya sa iyang mga kababayan, pamilya ug labaw sa tanan sa lokal nga kagamhanan sa dakbayan sa Panabo.
Gikanayon usab ni Resueño nga dakong dungog alang sa mga taga Panabo ang naangkong kadaugan ni Jerwin Ancajas.
Kahinumduman nga gipildi ni Ancajas ang Mexicano nga si Israel Gonzales sa ilang panagsangka niadtong Pebrero 2, 2018 sa Bank of America Center sa Corpus Christi, Texas.
