DAVAO CITY – Padayon ang pag-welcome sa pipila ka mga opisyal sa dakbayan sa pag-abot sa mga student-athletes sa tibuok rehiyon tulo ka adlaw ayha ang pag-abli sa pinakadakong regional sporting event sa Davao region.
Matud pa kang Jenelito Atillo, tigpamaba sa Department of Education-11 nga anaa sa 7,300 student-athletes, officiating officials, coaches ug chaperones ang laomon nga modagsa dinhi sa siyudad alang sa weeklong Davao Regional Athletic Association Meet 2018 (DAVRAA) sa Pebrero 18-23.
Nasayran kang Atillo nga ang mga delegado gikan sa probinsiya sa Davao del Norte nga adunay 600 partisipante ang unang miabot sa siyudad samtang mayorya sa mga delegado gikan sa uban nga probinsiya ug mga siyudad ang miabot kagahapong adlawa.
Dungan sa pag-abot sa mga partisipante, gi-ubanan sila sa mga security personnel aron nga masiguro ang ilang kaluwasan.
Kauban sumala pa nga misakay sa bus ang security officials aron nga siguradong ma-protektahan ang tanan.
Gipasalig sab ni Atillo nga walay mga atleta nga matulog sa cartoon o sa salog sama sa milabay nga DAVRAA ug uban pang sporting events sama sa Palarong Pambansa ilabi na nga kompleto na ang katulgan sa matag billeting areas.
Gilayon sab sumala pa nila nga hatagan ug aksiyon sa higayon nga adunay reklamo ug concern ang mga delegado.
Magtigi ang mga Student-athletes sa mga nagkadaiyang sports lakip na ang 21 ka mga sporting events, lima ka special games ug tulo ka mga demonstration games aron nga dako ang tsansa nga makig-atbang ang mga nahisgutan sa national level sa Palarong Pambansa sa Ilocos Sur nga gikatakda sa Abril 16-20.
