DAVAO CITY – Gihinumdom karong adlawa ang ika-kuwarenta diyas sa kamatayon sa 38 ka mga call center agents human masunog ang NCCC Mall niadtong Desyembre 23, sa nakalabay nga tuig 2017.
Labot niini, subling milusad ug lihok protesta ang grupo sa BPO Industry Employer Network ug sa Unified Employees of Alorica Inc. sa bisinidad sa nasunog nga mall kaganinang buntag.
Gisingit lamang gihapon sa mga nahisgutan ang hustisya alang sa ilang mga kaubanang call center agents gumikan kay hangtud karong panahuna pabiling walay nasilutan sa nahisgutang panghitabo.
Sumala pa ni Sara Prestosa, ang tigpamaba sa nahisgutang grupo, tataw nga nakahimo ug dakong kalapasan ang management sa mall, lakip na ang kabomberohan gumikan sa pagpasagad sa ilang responsibiliad.
Apan bisan pa man niini, nagpabiling pakyas ang pamilya sa mga biktima nga makab-ot ang katarungan alang sa namatay nilang kabanay.
Nalisang ang mga nahisgutan nga mahulog na lamang sa kalimot ang tanan.
