DAVAO CITY – Padayon karon nga giimbestigahan ang usa ka 15 anyos nga ulitawo nga mipatay sa iyang pag-umangkon human wala nadayon ang iyang planong paglugos niini.
Nahitabo ang moang luog nga krimin sa Barangay La Union, San Isidro, Davao Oriental.
Dali usab nga gisikop sa San Isidro Municipal Police Station ang suspek nga si alyas Manuel human gipatay ang iyang pag-umangkon nga si Jennylyn Hongoy, 16-anyos, usa ka estudyante samtang samdon usab ang 12-anyos nga igsoon niini human maigo sa hinagiban sa suspek.
Atol sumala pa sa panghitabo, gitumong sa suspek nga wala ang mga ginikanan sa duha ka biktima human nga duna kini gilakaw hinungdan nga naka-higayon ang suspek sa iyang dautan nga tuyo.
Gisulayan unta sa paglugos ni Manuel ang iyang pag-umangkon apan misukol kini ug misinggit hinungdan nga gihansakan sa suspek sa iyang dala nga kutsilyo ang biktima hinungdan sa kamatayon niini.
Wala hinoon makasibat ang suspek sa lugar human nga daling misumbong sa kapulisan ang usa ka saksi ug gitudlo ang suspek.
Sa karon, padayon pa ang imbestigasyon sa panghitabo.
