DAVAO CITY – Duna na’y lead ang Pikit PNP sa posibling mga tulisan ug mga carnapper nga mibiktima sa taxi driver sa Fiesta Taxi Company nga si Jerry Gulay, 23 anyos, residente sa Barangay Mudiang, Bunawan District, Davao City.
Kini ang gikompirma ni PCI Donald Cabigas, hepe sa kapolisan sa lungsod sa Pikit, North Cotabato kinsa padayon nga milusad ug sobosob nga pagpananobay labot sa nahisgutan nga krimin.
Kahinumduman nga mga alas 5:00 sa hapon niadtong Sabado Marso 25 mibiyahe paingon ngadto sa kabacan ang iyang bana human nga duna sumala pa’y usa ka babaye gikan sa Davao airport ang nagpahatud kang Jerry.
Nagduda sumala pa ang mga kaubanan sa bikitma nga mga taxi driver gumikan kay dili matud pa mosugot ang maong pasahero nga adunay mokuyog kanila.
Gikanayong gimonitor sa iyang mga kaubanan ang biyahe sa biktima gumikan kay ila pa kining na-contact pasado alas otso sa gabii dihang nakaabot kini sa Kabacan apan pagka-alas onse sa gabii, igo na lamang nga mo- ring ang cellphone ni Jerry ug dili na kini tubagon.
Sumala pa kang PCI Cabigas nga sa ilang tan-aw carnapping ang tumong sa posibling mga suspek nga mibiktima kang Jerry.
Kini gumikan kay gitinguha sa mga suspek nga dad-on palayo ang taxi innova sa biktima apan naka-lock ang manobela sa taxi. Nabali kini sa dihang gipugos sa mga suspek nga mapadagan ang taxi.
Usa sab ni sa gitan-aw nga hinongdan nga gidagmalan ang driver human nga wala mitabang nga ma-unlock ang manubela sa taxi.
Sumala pa kang PCI Donald Cabigas nga nasayran nila ang krimin human nga mi-report ang Barangay Kapitan sa Barangay Bocotan, Pikit, North Cotabato kalabot sa na-abandona nga taxi nga innova ug sa pagkakaplag sa patay nga lawas sa driver niini sa usa ka suba.
