DAVAO CITY – Tulo na ang gikatala nga patay sa natigayon nga engkwentro tali sa mga tropa sa kagamhanan ug mga rebeldeng New People’s Army (NPA) sa Laman, Calinan ning dakbayan human nga nabugtu-an sa iyang kinabuhi ang sundalo nga kritikal ang kondisyon nga gidala sa Southern Philippines Medical Center (SPMC).
Tulo ka adlaw sab nga nakigbisog sa iyang kinabuhi si Mike Villanueva, 35 anyos, sakop sa 3rd IB Philippine Army nga nakabase sa Calinan, ning dakbayan sa Davao.
Nabugtu-an sa iyang kinabuhi ang sundalo mga alas 10:24 kagahapon sa buntag.
Hwebes sa hapon gidala ang biktima human nga kalakip sa tropa sa kagamhanan nga nabuthan sa mga landmine nga gitanum sa mga rebeldeng NPA.
Unang nangamatay sa landmine explosion sila si Corporal Michael Yadao nga taga-Opol, Misamis Oriental, ug PFC Vernel Damondon, nga taga-Koronadal City, South Cotabato.
Ang patay nga lawas sa duha ka mga sundalo nadala na sa ilang tagsa ka mga pinoy-anan. Samtang ang iyang ni Villanueva gipahiluna na sa St. Peter Chapel sa Calinan, ning dakbayan.
Dese siete ang gikatalang angol sa pagbusikad sa landmine diin ang mga sundalong samdon padayon nga gitambalan sa tulo ka managlahi nga hospital, lakip na ang Southern Philippines Medical Center (SPMC).
