DAVAO CITY – Migula sa imbestigasyon sa Davao City Police Office (DCPO) nga usa ka Ring Mark S. Tobato, 20, taga-Sto. Nino, Riverside, Sasa, ning dakbayan sa Davao ang mi-ambak sa Gaisano Mall, Bajada, ning dakbayan sa Davao kaganinang alas 10:04 ang takna sa buntag.
Sumala pa kang PSI Catherine Dela Rey, tigpamaba sa DCPO nga problema sa pamilya ang hinongdan sa paghikog sa biktima. Ang iyang amahan komplikado ang sakit.
Gipapalit lamang sumala pa ug tambal ang biktima ug wala gayud magtuo ang kabanay nga makahuna-huna kini sa pagpakamatay.
Mi-ambak ang biktima gikan sa 5th Floor sa Gaisano Mall, sa JP Laurel Avenue, ning dakbayan sa Davao kaganinang alas 10:04 ang takna sa buntag.
Sumala pa kang Jomari Alameda, nagapamaligya ug juice sa mall nga mao pa lama’y pag-abli sa mall sa dihang kalit na lamang nga mipaka sa atrium nga bahin ug nakita na lamang sa mga tenants ug sa mga katawhan sa sulod sa mall.
Unang gikatuohan nga bangko lamang ang nahulog ug mipaka sa salog sa mall.
Gikahulagway ang biktima nga nagsul-ob ug kaki nga shorts ug strife nga t-shirt.
Samtang gikompirma ni PCI Noland Genova sa Scene of the Crime Operatives (SOCO) sa Davao City Police Office (DCPO) nga midungan sa pagsulod ang biktima sa pag-abli sa mall ug milahos sa 5th floor ug wala’y pupanagana nga mi-ambak.
Subay sa paghiling sa mga SOCO nabuak ang bagul-bagul sa biktima.
Duna kini tattoo nga neon-fire sa tuo nga bukton.
Wala’y unod ang bulsa sa biktima.
Wala sab kini’y tsinilas.
