Gisugdan na sa lokal nga panggamhanan ang pagpalit ug mga moderno nga mga kahimanan alang sa mga bag-ong security equipment nga gipangayo sa Task Force Davao (TFD) hinungdan nga laoman ang permanent Border Control ug Inspection Facility (BCIF) sa Lasang nga sugdan karong tuiga aron nga mas mapahugtan pa ang pagpatuman ug seguridad.
Matud pa kang TFD Commander Colonel Erwin Bernard Neri, gisugdan na ang pagpalit ug mga bag-ong metal detectors, signal jammers alang sa improvised explosive device, X-ray machines, ug walk-through scanners.
Gisumite na sab sumala pa sa ilang buhatan ang tanan description ug specification sa mga ekipo ngadto sa Public Safety and Security Command Center ug hulaton na lamang nila ang turn over.
Nakadesisyon sab sila nga dili tawagon ang BCIF isip checkpoint, aron nga dili kini mohatud ug negatibo nga impresiyon sa publiko. Sa kasamtangan, wala pa gihimo ang mamahimong disenyo sa maong pasilidad.
