Kapin sa 900 ka estudyante ug 16 ka staff ang gilayon nga naluwas gikan sa usa ka eskwelahan sa Bidur, Nepal, sa wala pa miabot ang kusog nga pagbaha.
Niadtong Agosto 26, didto sa Tribhuvan Trishuli Secondary School si Headmaster Rajendra Dawadi sa dihang nakadawat og pahimangno ang accountant sa eskwelahan bahin sa umaabot nga baha.
Nakakuha kuno kini og impormasyon gikan sa usa ka paryente sa Rasuwa, nga una nang naapektuhan sa pagbaha.
Gilayon nga gipahunong ni Dawadi ang klase ug gisugdan ang evacuation.
Gisugo usab niya ang mga bus nga padulong pa lamang sa eskwelahan nga dili na mopadayon.
Gisundo sa pipila ka mga ginikanan ang ilang mga anak, samtang ang uban gisakay sa mga bus o midagan padulong sa mas taas nga lugar.
Gibanabanaan nga 14 minutos lamang ang milabay sa wala pa miabot sa lugar ang kusog nga agos sa tubig ug lapok.
Sa dihang nakalabang na ang katapusang bus sa bag-ong tulay, nahugno usab ang daang tulay.
Kahinumdoman nga kabahin kini sa dakong pagbaha sa Nepal nga gikatahong nakapatay og kapin 900 ka tawo, samtang libo-libo pa ang gikonsiderang missing.
Alang kang Dawadi, personal ang pagkawala sa eskwelahan tungod kay dinhi usab siya kaniadto nag-eskwela sa wala pa siya nahimong magtutudlo ug sa ulahi nahimong headmaster.
Naglaum kini nga matukod pag-usab ang eskwelahan sa mas luwas nga lugar aron makabalik sa pag-eskwela ang mga estudyante.
| via Bombo Ray Ann Martinez
