DAVAO CITY – Giserbehan sa Social Security System kon SSS og notice of violation ang 12 ka mga employers sa Nabunturan, Davao de Oro.
Gilangkuban ang maong mga establishemento sa agri-trading, inland resort, lumber dealer, industrial/electrical supply store, salon, bakeshop, car repair shop, catering store, engine and spare parts dealer, gas station, ug duha ka food stores.
Sumala kang Acting Branch Head II Imelda A. Guerra, ang maong kampanya kabahin sa national simultaneous Run After Contribution Evaders (R.A.C.E) diin sa ilang operasyon mikabat sa 137 ka empleyado ang apektado sa wala pag remit sa employers niini og P4.6 million nga kantidad sa SSS contributions.
Hinuon gipasabot ni Corporate Executive Officer II Annabelle M. Flores sa Employer Delinquency Monitoring Department-SSS Davao, nga ang mga negosyante nga nagmalapason, hatagan og 15 ka adlaw aron i-settle ang ilang obligasyon.
Kon magmagahi matod pa ang mga nahisgutan sa pagsettle sa ilang obligasyon, diha na sila mupagawas og demand letter nga posibleng magresulta sa pagpasang-at og kaso sa prosecutors office.
Sa pikas bahin gikabutyag usab ni Asst. Branch Head Rita Fe S. Limbaga nga nagahanyag ang SSS og installment program alang niadtong mga negosyante nga maglisud og bayad.
Sa installment program, mukabat sa 24 ngadto sa 48 ka buwan nga pwede kining mabayran sa mga employer depende sa kantidad nga wa nila nabayran.
Sa datos sa ahensya as of December 2022, dunay 5,541 business employers sa Davao del Norte ug Davao de Oro, pero anaa lang sa 39.16%, o average nga 2,170 employers, ang nagbayad og binuwan nga contributions sa ilang mga empleyado.
