DAVAO CITY – Sikop sa mga sakop sa Jose Abad Santos Municipal Station ang usa ka Most Wanted Person atol sa ilang gipahigayon nga operasyon kagahapong adlawa sa Brgy Tanuman, Jose Abad Santos, Davao Occidental.
Naila ang dinakpan nga si Thomas Aloy Lintang, 62 anyos, mag-uuma, residente sa Brgy. Tanuman, Jose Abad Santos, Davao Occidental kinsa nasikop pinasikad sa gahum sa Warrant of Arrest gumikan sa kasong paglapas sa RA 10591 diin makaggawas lamang kini kung makaduso ug piyansa nga 170,000.
Gipagula ang maong kamandoan ni Hon. Carmelita Sarno-Davin, Presiding Judge sa 11th RTC, Branch 18, Digos City Davao del Sur.
Kasamtangan karun nga gipaslak sa presohan ang dinakpan.
Gimandoan sab ni Davao Occidental Provincial Director, Police Colonel Roel DR Flores ang tanan nga mga hepe sa kapulisan sa lalawigan nga pahugtan pa ang kampanya batok sa mga wanted persons arun nga mapugngan ang bisan unsa man nga lawlessness arun nga mapabilin sa Davao Occidental ang kalinaw.
