Gihagit ni Vice President Sara Duterte si Defense Secretary Gilberto “Gibo” Teodoro Jr. nga hinganlan ang mga opisyal sa gobyerno nga iyang gipasabot nga “pro-China” o nagdepensa sa Beijing may kalabotan sa isyu sa West Philippine Sea (WPS).
Gihimo ni Duterte ang maong pahayag sa Davao City niadtong Huwebes, Agosto 6, 2026, human sa unang panawagan ni Teodoro nga ang mga opisyal sa gobyerno nga wala mosuporta sa polisiya sa Pilipinas ug kunoy mikampi sa China angayng mobiya sa ilang katungdanan.
Sumala pa ni Duterte, dili angay nga magpagawas og seryosong akusasyon ang usa ka opisyal sa gobyerno nga walay klarong paghingalan sa mga indibidwal nga iyang gipasabot.
Gipasabot sa bise presidente nga ang pagbaton og kinatibuk-ang akusasyon nga walay tukmang gitumong mahimong mosangpot sa sayop nga pagduda ug lainlaing espekulasyon batok sa ubang mga opisyal nga walay kalabotan sa maong isyu.
Dugang pa niini, giingon ni Duterte nga tungod sa kawalay klaro sa pahayag ni Teodoro, mahimong madamay bisan ang ngalan ni Presidente Ferdinand “Bongbong” Marcos Jr. sa mga pagduda sa publiko.
Kahinumduman, una nang gibatikos ni Davao City Rep. Paolo “Pulong” Duterte si Teodoro ug giaghat kini nga undangon ang paghulagway sa China isip kaaway, samtang iyang gihagit usab ang kalihim nga hunongon ang gitawag niyang “loyalty test” batok sa mga opisyal sa gobyerno.
Sa laing bahin, mitubag ang Malacañang niadtong Lunes, Agosto 3, pinaagi sa pag-awhag sa mga opisyal nga adunay susamang baruganan kang Rep. Duterte nga magpa-ila aron mahibal-an sa publiko kung kinsa ang tinuod nga nagbarog alang sa interes sa Pilipinas.
Sa kasamtangan, gipasabot ni Teodoro nga kabahin lamang sa katungdanan sa matag opisyal sa gobyerno ang pagpanalipod ug pagsunod sa polisiya sa estado subay sa Administrative Order No. 29.
