DAVAO CITY – Hingpit nang gipasailawom sa State of Calamity ang tibuok probinsya sa Davao de Oro, usa ka simana na ang ninglabay human nahitabo ang duha ka sagunsong pagtay-og kaniadtog Marso 7.
Gumikan kana sa Resolution No. 0556-2023 nga gisumitar kaniadtong Sabado, Marso 11, nga giaprubahan sa Sangguniang Panlalawigan diin gipanawagan karon ang tabang gikan sa nagkalain-laing ahesya aron matubag ang mga panginahanglan sa mga apektadong residente.
Sumala sa Republic Act 10121 or Philippine Disaster Risk Reduction and Management Act of 2010, muabot sa 30 percent sa local disaster risk reduction management fund sa probinsya ang magamit isip Quick Response Fund alang sa pagpatuman og mga recovery programs aron makunhuran ang lisud nga kahimtang sa mga naigo sa maong kalamidad.
Sumala sa Provincial Risk Reduction Management Council, muabot na sa 229,647 ka mga pamilya og 194,057 ka mga kabalayan sa tibuok probinsya ang gikatalang apektado human sa nahitabong magnitude 5.9 nga linog.
Muabot na sab sa kapin P265 million ang kinatubuk-ang danyos sa mga nagubang imprastraktura lakip na ang lapas 160 ka mga tulunghaan ug ubang gambalay.
Samtang sumala sab sa Office of Civil Defense Davao Region as of 2AM of March 13, gikatala ang nasa 1,516 ka mga pagtay-og, diin 36 lamang ang nasinatian niini.
via || Bombo LJF
