DAVAO CITY – Mipanaw na ang usa sa mga partisipante sa natigayong Ironman 70.3 triathlon kagahapon human siya gikatahong giatake sa kasingkasing samtang nagsubay kini sa swimming course sa maong karera.
Giila ang namatay nga si Jerry Kasim, usa ka beterano ug iladong manlalangoy ug swimming coach dinhi sa Davao City.
Mipanaw si Kasim sa edad nga 49 anyos.
Gikasubo pag-ayo sa tibuok swimming community dinhi sa dakbayan lakip na sa nagasubong pamilya ang kalit nga pagtaliwan ni Kasim.
Sumala pa sa pahayag sa iyang igsuon nga si Sanita Kasim Soreny, gisulayan pa og dala ang atleta ngadto sa Southern Philippines Medical Center apan nakabsan na siya sa iyang gininhawa.
Nahimong ilado sa Davao City si Kasim gumikan sa iyang kahanas sa isport nga swimming nga naghatag sa rehiyon og mga medalya sa Palarong Pambansa ug National PRISAA Games.
Usa pud siya ka empleyado sa DepEd Davao ug nahimong coach sab sa pipila ka mga swimming teams sa rehiyon.
Gikatakdang ilubong si Kasim karong adlawa, Marso 27, subay na sa tradisyong Islam.
Gikumpirma mismo sa mga organizers ang kamatayon ni Kasim atol sa opisyal na pamahayag kagabii, samtang wala na sab naghatag og ubang detalye ang organizers subay na sab sa hangyo sa nagbangutang pamilya.
Nagpabot na og pahasubo ang Davao City LGU sa mga nabiyaang pamilya, higala ug kabanay ni Kasim.
via || Bombo LJF
