DAVAO CITY – Nagpagawas ug pahayag ang University of Mindanao mahitungod sa college instructor nga nalambigit sa kasong sexual harassment.
Sumala pa sa tigdumala sa unibersidad, nakaabot na sa ilaha ang maong balita nga usa sa mga faculty member gikan sa UM Digos College ang gikasuhan karon sa ilahang estudyante.
Gisugdan na nila ang imbestigasyon samtang wala pa’y nadawat nga reklamo ang maong tulunghaan.
Gipaklaro sa UM nga usa ka serious offense ang ang sexual harassment, ilabi na kon ang magtutudlo mismo ang nagbuhat niini sa ilahang estudyante, maong dili matud pa magduha-duha nga pahawaon sa pwesto ang bisan si kinsang mapamatud-an sa maong binuhatan.
Kahinumdumang giaresto atol sa usa ka entrapment operation ang usa ka 39 anyos nga magtutudlo nga si Melchizedeck John Bañas human siya gisumbong sa usa ka 20 anyos nga estudyante ngadto sa mga otoridad.
Matud pa sa biktimang si alyas Langga, gihagad siya sa iyahang maestro nga makighilawas baylo sa pagkapasar niini sa iyahang subject.
Pasado alas 2 sa hapon dihang napalgan sa operating team sulod sa usa ka lodging inn sa Lim Extension, Digos City ang duha nga wala nay mga panabton ug nakasapin na lamang ug tuwalya.
Mag-atubang ug kasong Sexual Harassment and Seduction ang suspek, samtang mupasailawom ang estudyante sa usa ka counseling sa CSWDO Digos City.
via || Bombo LJF
