DAVAO CITY- Nagpakatag og dugang personahe ug nakaalerto usab ang Task Force Davao human sa nahitabong pagpamomba sa usa ka bus sa Tacurong City diin adunay usa ang natalang nakabsan sa kinabuhi ug 11 ka mga indibidwal ang samaran human nga mibusikad ang usa ka improvised explosive device kon IED ug lain pa nga duha ka IED ang nadiskubrehan nga wala mibuto.
Gikabutyag usab ni Lt. Col. Darren Comia, Commander sa Task Force Davao, nga mas gipahugtan ang seguridad sa rehiyon sa Dabaw bisan pa man wala nahitabo ang maong insidente diri sa rehiyon.
Sumala kang Comia, gidungagan usab ang mga personahe nga gipakatag sa tanang boarder control point aron nga makunhuran ang linya sa mga sakyanan nga nagasulod-guwa sa rehiyon ilabi na nga taliabot na usab ang pagselebrar sa yuletide season.
Usa sa mga kalihukan nga gipatuman mao ang pagsakay sa mga personahe sa TF Davao ngadto sa mga bus kon Bus Boarding Operations, visibility patrol ug foot patrol.
Sa pikas bahin, kahinumduman nga nagpagawas og kamanduan ang Davao City Police Office nga wala ginatugutan ang tanang bus drivers nga magpick-up og mga pasahero sa tanang bus stops aron nga mapailawom sa inspeksyon ang tanang bagahe nga dala sa matag pasahero.
Samtang, mihangyo ngadto sa katawhan si Comia nga makig-alayon gayod, mutuman sa mga sumbanan aron nga malikayan ang aberya.
