DAVAO CITY – Nataod na sa lokal nga panggamhanan sa Davao de Oro ang anaa sa kapin 67 ka mga tent aron temporaryong kapuy-an sa mga apektadong residente sa Zone 1, Barangay Masara, Maco, Davao de Oro human nga midahili ang yuta niadtong milabay nga Pebrero 6 ning tuiga nga mikalas og dul-an gatusan ka mga kinabuhi.
Nahimutang ang mga tents ngadto sa Quasi Parish, Barangay Elizalde, Maco, Davao de Oro aron nga maoy magsilbing temporaryong pinuy-anan sa mga residenteng anaa pa karon nagdasok sa 13 ka mga evacuation centers.
Gidonar ang maong tent sa Philippine Red Cross, inabagan sa Provincial Engineering Office, PDRRMO ug uban pang ahensya.
Lauman nga madungagan pa ngadto sa usa ka gatos ka mga tents ang gipaspasan karon og lihok sa LGU aron largo na kining puy-an sa mga biktima.
