Giaprubahan na sa Senado ang Senate Bill 1982 o ang sugyot nga emergency congressional authorization alang kang Pangulong Ferdinand Marcos Jr nga mosuspendi sa fuel excise tax.
Ang tumong niini mao ang pagpakunhod sa epekto sa nagpadayon nga tensyon sa Middle East.
Nakakuha kini og 17 ka boto pabor, walay misupak ug walay nag-abstain.
Human ma-certify ni Pangulong Marcos ang maong sugyot, wala na gipatuman sa Senado ang three-day rule ug gilayon kini og gi-aprobahan.
Sa bersiyon sa House of Representatives, ang House Bill 8418 nga gi-aprubahan sa lower chamber niadtong Lunes, nagkinahanglan una og deklarasyon sa pangulo og state of national emergency o calamity aron ma-justify ang pagsuspinde o pagkunhod sa excise tax sa mga produktong petrolyo.
Matod ni Senator Sherwin Gatchalian, mibotar siya pabor tungod kay nagkinahanglan ang katawhan og hinanali nga tabang batok sa padayon nga pagsaka sa presyo sa lana.
Samtang si Senator Risa Hontiveros mibutyag nga ang sugyot makahatag og temporaryong kahupayan sa mga Pilipino, sumasakay ug gagmay’ng negosyante.
Apan gipasidaan ni Senator Pia Cayetano, chairman sa Senate committee on ways and means, nga ang pagsuspinde sa fuel excise tax mahimong hinungdan sa pagkawala sa kita sa gobyerno nga moabot og P136 bilyon.
