DAVAO CITY – Gipasalig sa Philippine Institute of Volcanology and Siesmology (Phivolcs) nga wala’y angayan nga kabalak-an sa duha ka mga linog nga miigo sa Davao Occidental ug Davao Oriental dili pa lamang dugay.
Gitataw sa Phivolcs nga hinay lamang kayo ang nahisgutan nga mga linog.
Nakompirma sab sa Provincial Risk Reduction Management Office (PRRMO) nga wala’y natala nga danyos ang nahisgutan nga insidente.
Kahinumduman nga alas 11:28 kagahapon sa buntag magnitude 2.5 ang miigo sa Sarangani, Davao Occidental.
Gitataw sa Phivolcs nga tectonic in origin ang nahisgutan nga linog ug wala kayo kini nabati gumikan kay anaa sa 45 ka kilometros ang gilay-on sa sentro niini gikan sa baybayon sa sidlakan nga bahin sa Sarangani.
Alas 11:43 sa buntag mas kusog nga linog ang namonitor sa Baganga, Davao Oriental diin Magnitude 4.7 kini apan wala sab namatikdan sa uban nga lugar gumikan kay intensity 1 lamang kini sa Bislig City, Surigao del Sur ug tectonic ang tinubdan niini.
Base sa monitoring sa Phivolcs trese ka mga linog ang sunod-sunod nga nahitabo sukad pa kagahapon sa kaadlawon, apan mas hinay ra kini ug halos wala mabati sa daku nga bahin sa Davao Region.
