DAVAO REGION- Nanawagan karon ang pamunuan sa Southern Philippines Medical Center sa mga katawhan nga mag-donate ug dugo aron nga adunay pundo nga dugo alang sa mga pasyenteng nagkinahanglan sa nasampit nga ospital.
Gikanayon ni Maria Lourdes B. Guerra, SPMC Blood Production Services (BPS) supervisor, nga matag adlaw adunay usa ka gatos ka unit sa dugo ang gikinahanglan sa mga pasyente ug gumikan niini mas palapdan pa ang himuong kampanya sa pagdonar ug dugo alang sa mga nanginahanglan ilabi na sa panahon sa emerhensiya.
Apan luyo paman niini giklaro sa kadumalaan sa maong ospital nga walay shortage sa dugo karon panahuna bisan paman nga tibuok Mindanao ang ginadawat nga pasyente sa maong ospital apan gikinahanglan lamang nga adunay pundo aron nga dili moabot sa punto nga magkulang ang dugo sa maong ospital.
Gikanayon sab ni Janson B. Cajegas, ang SPMC BPS donor recruitment officer, nga dakong tabang ang ginahimong blood donation drives sa mga komunidad sa pagmintina sa suplay sa dugo.
Nag-awhag sab ang pamunuan sa SPMC nga si bisan kina ang mamahimong blood donor nga mamahimong mobisita sa blood service facilities sa syudad lakip na sa SPMC BPS,Sub-National Blood Center Davao ilawum sa Department of Health ug Philippine National Red Cross.
