Nanawagan si Senadora Loren Legarda sa Kongreso og dinalian nga aksyon aron masulbad ang kahuot sa mga classroom sa mga pampublikong eskwelahan.
Gipasiugda ni Legarda nga dili lamang ang kalidad sa edukasyon ang naapektuhan sa overcrowding, kondili lakip na usab ang kahimtang ug kaayohan sa mga magtutudlo.
Gibutyag sa senadora nga bisan mikunhod na ang national student-to-classroom ratio, wala gihapon niini makita ang tinuod nga kahimtang sa pipila ka lugar nga nakasinati gihapon og grabeng overcrowding.
Base sa 2025 study sa Philippine Institute for Development Studies (PIDS) ug Second Congressional Commission on Education, mikunhod gikan 39 ngadto sa 32 ka estudyante matag classroom ang average ratio sa public elementary schools niadtong 2021.
Mikunhod usab gikan 54 ngadto sa 44 ka estudyante matag classroom ang ratio sa junior high school.
Apan sa pipila ka eskwelahan sa National Capital Region, Calabarzon, Soccsksargen ug Bangsamoro Autonomous Region in Muslim Mindanao, molapas gihapon sa 60 ka estudyante ang anaa sa usa ka classroom.
Gipasidaan ni Legarda nga mahimong makaapekto sa kalidad sa pagtudlo ug pagkat-on ang sobrang kadaghan sa estudyante sa usa ka classroom.
Gipanghimatuod sa senadora ang iyang pag-file sa Senate Bill No. 2397, o ang proposed Public School Class Size Act, aron matubag ang maong problema.
Tumong sa sugyot balaodnon nga mapatuman ang mas hapsay nga class size sa mga pampublikong tulunghaan ug masiguro ang igo ug angay nga learning environment alang sa mga estudyante ug magtutudlo.
Giinsistir niini nga gikinahanglan ang legislative action aron masulbad ang overcrowded classrooms ug mapaayo ang kalidad sa edukasyon sa Pilipinas.
