Dili halos makatuo si Senador Risa Hontiveros sa pagpasaka ug Certificate of Candidacy ni Pastor Apollo Quiboloy aron mudagan sa pagka-senador.
Gipahayag pa sa Senadora mao ang nag-unang mibutyag sa mga krimen nga gikalambigitan ni Quiboloy susama sa Child Abuse, money laundering ug human trafficking, dili angay botohan ang bisan si kinsang lawbreaker isip lawmaker.
Dugang pa ni Hontiveros nga makabaton unta ug gamay nga kaulaw si Pastor Apollo Quiboloy.
Alang sa usa ka tawo nga nag-atubang ug daghanang kaso ug nagtago pa sa balaod, nagbaton na hinuon kini ug kaisog nga ipresenta ang kaugalingon sa katawhan aron mahimong magbabalaod.
Katungod sa matag usa nga magpapili aron magserbisyo sa nasud, apan nagtuo ang Senadora nga adunay insaktong kasayuran ang mga Pilipino aron gamiton ang katungod nga mupili sa mga lider ug aron dili usab botohan si Quiboloy.
Samtang gitubag usab kini sa usa ka kanhing Presidential Legal Adviser sa nakalabayn administrasyon nga si Atty. Salvador Panelo nga wala matud pay basehan si Senadora Hontiveros aron hukman na gikayon si Quiboloy, gumikan wala man matud pa kini na konbikto sa mga kasong gipasang-at batok kang Quiboloy.
