DAVAO CITY – Subli nga nagpahimangno ang buhatan sa Security and Exchange Commission-Davao (SEC-Davao) ngadto sa publiko nga likayan ang pag-invest sa pipila ka mga kompanya diin ang mga sakop niini ingon man grupo ang naga-awhag nga mag-invest kanila bugti sa dakung saad nga salapi nga mamahimong madawat.
Pipila sa mga gitumbok niini nga mga kompanya nga sakop sa area of responsibility sa SEC-Davao ang gilangkuban sa Astrazion International, Astrazion Noble Task Community Foundation ug Astrazion Global Holdings Inc; Wellcons Unlimited Systems Inc; “DYMs”/Double your money; LFC Football/LFC Football Philippines/LFC Football Platform/ LMB Football; ug BF Football/BF Football Investment Platform/BF Football Hedge Fund Investment Platform.
Una ng nagpagula ang SEC-Davao ug 44 advisories sa milabay nga bulan batol sa mga organisasyon nga nalambigit sa investment schemes, 116 advisories usab sa milabay nga tuig ug 123 kaniadtong 2020, samtang sa 2019 nakatala sila ug 65 investment schemes sa Davao Region.
Dili pa lamang dugay, nagpagula sab ang SEC-Davao ug cease and desist order batok sa Alphanet-world Corporation nga ilalom pa gihapon sa istilo sa NWorld, BF Football/B, F MetroSport/BF Football Investment Platform/BF Football Hedge Fund Investment Platform, ug LMB Football nga gipangkonsidera gihapon nga mga investment schemes.
Nakapagula na sab ang komisyon ug orders of revocation batok sa MASSDROP Marketing and Franchising OPC ug MDM Ventures Corporation, SCENTKOWORLD Corporation ug Brendhal Cruz Holdings, Inc. ingon man IPC Philcom. Ph. Inc. Padayon ang panawagan sa SEC-Davao ngadto sa publiko nga mas maayong bisitahon ang ilang official website arun nga masubay kung unsa kadtong mga kompanya nga lihitimo ang operasyon arun nga dili mailad.
