DAVAO CITY – Kabsan sa iyang kinabuhi ang usa ka motor rider human nga naaksidente ganinang kadlawon, Oktobre 22 ning tuiga samtang naglawig sa Lanang cor. Fortune Homes, Sasa ning siyudad.
Subay sa rekord, giila ang biktima nga si alyas Lyod ug residente sa Barangay Lapu-Lapu, Agdao ning dakbayan.
Nasayrang nanubay ang biktima sa Daang Maharlika Highway paingon ngadto sa R. Castillo.
Apan, pag-abot sa biktima diin nahitabo ang disgrasya, kalit matud pa niining nabanggaan ang likod nga bahin sa taxi nga paingon muliko sa Fortune Homes.
Gumikan sa gikusgon sa impak, nawad-an kini og kontrol ug miabot sa pikas nga lane diin paingon sab ang usa ka trak rason nga natumba kini ug nadasok ilawom sa trak nga maoy nahimong hinungdan sa hinanaling kamatayon niini.
Sa karon, anaa na sa kustodiya sa kapulisan ang 2 ka mga drayber diin ang drayber sa taxi giilang si alyas Alimoden, 35 anyos ug residente sa Times Beach ning dakbayan, samtang giilang si alyas Jules ug residente sa Mabunao, Davao del Norte ang daryber sa trak.
