Gilambigit sa nagpakitang whisleblower si kanhi Presidential Adviser on Economics Affairs Michael Yang, Davao City 1st District Rep. Paolo “Pulong” Duterte, Atty. Mans Carpio ug uban pang personalidad sa bulto-bultong smuggling sa iligal nga droga sa nasud.
Sa pag-atubang niini sa unang adlaw sa imbestigasyon sa gimugnang Quad Comm o gihi-usang upat ka komite, walay pagduha-duhang gitudlo ni Jimmy Guban, kanhi intelligence officer sa Bureau of Customs (BOC), si Duterte, Carpio ug Yang nga mao ang nagpaluyo kuno sa smuggling sa P6.8 bilyong droga nga nakaplagan sa magnetic lifter sa BOC niadtong Agusto 2018.
Si Carpio mao ang mister ni Vice President Sara Duterte. Gilangkuban ang Quad Comm sa House Committees on Dangerous Drugs, Public Order and Safety, Human Rights ug Public Accountants.
Samtang gipahayag ni Guban nga bisan paman siya ang testigo sa imbestigasyon sa Senate Blue Ribbon Committee niadtong 2018 ug 2019 sa nahisgutang kaso, siya pa hinuon ang gikasuhan sa illegal drug shipment hinungdan nga nakombikto kini sa Manila Regional Trial Court niadtong 2019 ug nakulong sa Manila City Jail hangtod nga gibalhin siya sa National Bilibid Prisons.
Matod pa niini nga adunay dakong impluwensya ug gahum ang mga nalambigit sa operasyon sa smuggling sa iligal nga droga sa BOC ang lisod bangga-on, ubos sa kanhi administrasyon niadtong panahon sa drug war.
Dugang pa sa kanhi BOC intelligence officer nga usa kuno ka Councilor Nelson Abellera jr. alyas “Small” ug broker nga Chinese nga giila lamang sa alyas nga Henry, ang nagaproseso ug nagpagawas sa BOC sa mga iligal nga kontrabando sa mga nahisgutan lakip na ang mga produktong agrikultura nga gipasingitan ug iligal nga droga.
Dugang pa ni Guban, natingala sila nga ang mga overstaying ug kadudahang mga containers sa BOC ang kalit na lamang mawala.
Samtang mosobra sa 350 ka mga kontrabando ang ilahang naharang apan gipalusot kini sa BOC gumikan sa pagpanghilabot sa impluwensyadong personalidad.
Wala kunoy mga dokumento, walay gatepass ug wala usab mi-agi sa Xray ang mga kadudahang kontrabando nga adunay sulod nga droga nga gikan sa China. Gisulti kuno kaniya ni Small nga nagtrabaho kini kang Yang, Duterte ug Carpio.
