DAVAO CITY- Mipadangat ug pahasubo ang Police Regional Office 11 sa kamatayon sa usa sa mga miembro sa KOJC.
Apan gitin-aw sa PRO 11 nga ang kamatayon ni Edwin Escubido Cababat, 51 anyos, usaka food vendor ang walay kalambigitan sa nagpadayong pagpatuman sa warrant of arrest batok kang KOJC founder Pastor Apolo Quiboloy.
Gidasig usab sa kapulisan ang publiko nga sabton ang kasamtangan nga sitwasyon ug ang mga paningkamot nga gipatuman sa kapulisan aron lamang mabaruguan ang pagpatuman sa balaud.
Kahinumduman nga gidala si Cababat sa SPMC human gi-atake sumala pa sa sakit sa kasingkasing ug nakuyapan samtang “nag man” sa usa sa mga tower sa KOJC.
Apan, gideklara na sumala pa kining dead on arrival sa mga doktor sa SPMC.
Gikumpirma usab ni Atty Israelito Torreon nga usa ang kompirmadong patay, 4 ang naa sa kritikal nga kondisyon ug lain pang 16 ka mga miembro sa KOJC ang nangasamdan atol sa pag-atake sa kapulisan sa ilang compound alas singko ang takna sa kabuntagon kagahapong adlawa.
