DAVAO CITY – Giawhag sa Police Regional Office 11 ang mga opisyales sa matag lokalidad nga makig-alayon kanila kon ugaling makadawat og mga pagpanghulga sa ilang kinabuhi.
Gikanayon kana ni PRO 11 Spokesperson Eudisan Gultiano, nunot sa nahitabong pagpamanhig kang Negros Oriental Governor Roel Degamo nga gihatud na sa ulahing kapahulayan ning nakalabayng adlaw.
Bisan pa man nga walay natalang pagpanghulga sa mga elected local officials sa rehiyon, gipahinumduman gihapon ni Police Brigadier General Benjamin Silo Jr. ang mga commanders sa tagsa-tagsa ka mga istasyon nga makigkoordinar sa mga opisyales alang sa ilang kaluwasan.
Gipaklaro hinuon sa tigpamaba nga walay init nga politikanhong gubat diri sa rehiyon tungod na sab sa hugot nga seguridad, apan dili dapat kumpyansahan ug mas mamahimong luwas ang mga opisyales karong panahuna.
Gikanayon ni Gultiano nga mamahimo sila nga maghangyo alang sa security deployment hangtud duha ka pulis gikan sa PNP, nga posibleng dungagan pa kon ugaling ilabihan na ang pagdawat og hulga batok sa mga opisyal.
via || Bombo LJF
