DAVAO CITY – Gihan-an na karon sa Police Regional Office (PRO) Eleven ang pagpasaka ug kaso batok sa mga progresibong grupo nga nagpaluyo sa pagdala sa mga lumad sa UCCP Haran Compound sa Madapo ning dakbayan sa Davao.
Kalakip sa kaso nga laraw nga iduso batok sa mga suspek mao ang kasong Human Trafficking, paglapas sa Republic Act 7610, Serios Illegal Detention, lakip na ang violation sa IFRA law.
Wala pa gibutyag sa PRO-11 ang ngalan sa ilang pasaka-an ug kaso.
Sa milabay nga week-end giluwas gikan sa haran cpmpound ang 31 ka mga sakop sa Ata Manobo Tribe gumikan sa kapait sa ilang kahimtang sa Haran ug gikuyogan sila sa kasundalohan balik sa ilang ancestral land sa Barangay Gupitan, Kapalong Davao del Norte.
Sa maong ihap napulo kanila legal na ang panuigon, baynte uno ang mga menor de edad, diin ang pinakabata dos anyos pa lamang, samtang ang pinaka-tigulang nagpangidaron ug singkwenta y singko anyos.
Samtang sumala sa 10th ID pinaagi kang Capt. Jerry Lamosao nga nahatagan na ug assistance ang mga lumad, sama sa psyco-social intervention paghatag ug basic commodities ug financial assistance.
Ipailalum sab sila sa livelihood training pinaagi sa TESDA.
Nag-awhag ang mga tinugyanan sa balaod ngadto sa DSWD ug sa National Commission on Indigenous People (NCIP) nga mohimo ug lakang alang sa pagluwas sa mga nahabilin nga mga lumad sa Haran nga ginagamit sa mga progresibong grupo.
