Gawasnon na ang bilanggong saksi sa kill order sa tulo ka mga Chinese nga gipamatay sa bilanggo-an.
Gibuhi-an na sa Bureau of Corrections (BuCor) ang bilanggo nga si Jimmy Fortaleza, usa sa mga testigo nga miatubang sa pagdungog sa kamara sa drug war deaths sa administrasyong Duterte.
Matod pa sa BuCor, gitugutan sa Muntinlupa Regional Trial Court (RTC) Branch 206 ang petisyon ni Fortaleza sa habeas corpus with prayer aron sa pag-ihap sa special time allowance for loyalty (STAL) nini, gumikan sa kadugay na sa pagkabilanggo.
Gumikan sa STAL, walo katuig ang nabawas sa 32 katuig nga sentensya ni Fortaleza, hinungdan nga nahimong 24 katuig na lamang kini.
Gipahayag pa sa BuCor nga 2008 pa nabilanggo si Fortaleza o anaa sa 29 katuig ug lima kabulan na ang sentensya niini.
Gipahayag ni BuCor Director General Gregorio Catapang Jr., ipahibalo nila sa House Quad Committee ang desisyon sa korte kang Fortaleza gumikan kay anaa kini ilalom sa kustodiya sa komite isip ilahang testigo.
Kung kahinumduman, gisuportahan ni Fortaleza ang testimonya sa duha pa ka mga binilanggo sa pagpatay sa tulo ka mga Chinese nga matod pa drug lord ug nakulong sa Davao Prison and Penal Farm kaniadtong 2016.
Gipahayag ni kanhi Davao Prison and Penal Farm officer-in-charge Gerardo Padilla sa gihimong pagdungog sa komite, gisultihan kuno siya ni former Police Colonel Royina Garma, hepe kaniadto sa Cebu City Police nga dili babagan ang pagpatay sa tulo ka Chinese.
Dugang pa ni Padilla, nahinabi niini si Garma pinaagi kang Fortaleza nga classmate ub ni Garma sa Philippine National Police Academy (PNPA).
